කොළඹ මධ්‍යම බස් නැවතුම්පොළේ දැනට සිදුකෙරෙමින් පවතින ප්‍රතිසංස්කරණ කටයුතු පිළිබඳ සොයා බැලීම සඳහා ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්‍රාමික) මහතා නිරීක්ෂණ චාරිකාවක නිරත විය. මෙම අවස්ථාවට ගුවන් හමුදාපති එයාර් මාර්ෂල් බන්දු එදිරිසිංහ සහ ශ්‍රී ලංකා ගමනාගමන මණ්ඩලයේ සභාපති සජීව කනකරත්න යන මහත්වරුන් ද එක්ව සිටියහ. ශ්‍රී ලංකා ගුවන් හමුදාව විසින් ක්‍රියාත්මක කරනු ලබන මෙම ව්‍යාපෘතියේ ප්‍රගතිය සහ ඉදිකිරීම්වල ගුණාත්මකභාවය මෙහිදී විශේෂ අවධානයට ලක් විය.
මෙම ප්‍රතිසංස්කරණ කටයුතු ක්‍රියාත්මක වන්නේ “Clean Sri Lanka” ජාතික වැඩසටහන යටතේ යටිතල පහසුකම් නංවාලීම සහ පරිසර පවිත්‍රතාවය පවත්වා ගැනීම අරමුණු කරගනිමිනි. මගී ජනතාවට සහ කාර්ය මණ්ඩලයට අවශ්‍ය පහසුකම් ඉහළ නැංවීම මෙන්ම නගරය තුළ පොදු ප්‍රවාහන සේවයේ කාර්යක්ෂමතාව වැඩිදියුණු කිරීම මෙහි ප්‍රධාන අරමුණ වේ. ශ්‍රී ලංකා ගුවන් හමුදා සිවිල් ඉංජිනේරු අධ්‍යක්ෂ ජෙනරාල් එයාර් වයිස් මාර්ෂල් වජිර සේනාධීර මහතා විසින් ව්‍යාපෘතියේ වත්මන් තත්ත්වය පිළිබඳව ආරක්ෂක ලේකම්වරයා දැනුවත් කරන ලදී.
ප්‍රතිසංස්කරණ කටයුතු නියමිත ප්‍රමිතීන්ට අනුව සහ නියමිත කාලරාමුව තුළ නිම කිරීමේ වැදගත්කම ආරක්ෂක ලේකම්වරයා මෙහිදී අවධාරණය කළේය. ඒ සඳහා අදාළ සියලු පාර්ශ්වයන් අතර ඵලදායී සම්බන්ධීකරණයක් පවත්වා ගන්නා ලෙස ඔහු නිලධාරීන්ට උපදෙස් ලබා දුන්නේය. මෙම ව්‍යාපෘතිය අවසන් වීමත් සමඟ කොළඹ මධ්‍යම බස් නැවතුම්පොළ වඩාත් සුවපහසු සහ ක්‍රමවත් මගී ප්‍රවාහන මධ්‍යස්ථානයක් වනු ඇතැයි අපේක්ෂා කෙරේ.
