ඉරානයට එල්ල වූ ප්‍රහාරයත් සමඟ ලොව තීරණාත්මකම බලශක්ති මංසන්ධියක් වන හෝමුස් සමුද්‍ර සන්ධිය හරහා සිදුවන තෙල් සැපයුමට බාධා එල්ල වීමේ දැඩි අවදානමක් මතුව ඇති බව වාර්තා වේ. මෙම භූ-දේශපාලනික නොසන්සුන්තාව හමුවේ බොරතෙල් බැරලයක මිල ඇමරිකානු ඩොලර් 95 සිට 110 දක්වා ඉහළ යා හැකි බවට ආර්ථික විශේෂඥයෝ අනතුරු අඟවති. දැනට ඩොලර් 70ක පදනම් මිලක පවතින බැරලයක මිල, සැපයුම් අඩාල වීම සහ පවතින අවදානම හේතුවෙන් මෙලෙස ශීඝ්‍රයෙන් ඉහළ යාමට ඉඩ ඇති බව එම වාර්තා පෙන්වා දෙයි.
ඉරානය දිනකට බොරතෙල් බැරල් මිලියන 3.3ක් පමණ නිෂ්පාදනය කරන අතර, එය ගෝලීය සැපයුමෙන් සියයට 3ක් පමණ වේ. ඉරානය මෙම සැපයුම අඩාල කිරීමට පියවර ගතහොත්, සැපයුම් කම්පනය හේතුවෙන් බොරතෙල් මිල සියයට 9 සිට 15 දක්වා ප්‍රමාණයකින් ඉහළ යාමට ඉඩ ඇත. ලොව මුහුදු මාර්ගයෙන් ප්‍රවාහනය කරන තෙල් සහ දියර ස්වභාවික වායුවලින් (LNG) සැලකිය යුතු ප්‍රමාණයක් ගමන් කරන්නේ මෙම සමුද්‍ර සන්ධිය හරහා බැවින්, එහි ආරක්ෂාව ගෝලීය බලශක්ති වෙළෙඳාමට සෘජුවම බලපායි.
ඉරානය විසින් මෙම මාර්ගය සම්පූර්ණයෙන් වසා දැමීම වෙනුවට, නෞකා පරීක්ෂා කිරීම, ඩ්‍රෝන මගින් නිරීක්ෂණය කිරීම හෝ නාවික අභ්‍යාස පැවැත්වීම වැනි ක්‍රියාමාර්ග හරහා රක්ෂණ සහ ප්‍රවාහන ගාස්තු ඉහළ නැංවීමට කටයුතු කළ හැකි බව “ක්‍රයිසිස් ගෲප්” ආයතනය පවසයි. මැදපෙරදිග කලාපය තුළ ඇමරිකානු හමුදාමය වත්කම් ස්ථානගත කිරීමත් සමඟ දැනටමත් තෙල් මිල සියයට 10කින් පමණ ඉහළ ගොස් ඇති අතර, මෙම සමුද්‍ර සන්ධිය දීර්ඝ කාලීනව වසා දැමුවහොත් ඇමරිකාව ප්‍රමුඛ නාවික හමුදාමය ප්‍රතිචාරයක් එල්ල වීමට ද ඉඩ ඇති බව වාර්තාවල සඳහන් වේ.
