ඉරානය විසින් එල්ල කරන ලද ඩ්රෝන ප්රහාර හේතුවෙන් ලොව විශාලතම ද්රව ස්වභාවික වායු (LNG) නිෂ්පාදකයා වන ‘කටාර් බලශක්ති’ (QatarEnergy) සමාගම සිය නිෂ්පාදන කටයුතු සම්පූර්ණයෙන්ම අත්හිටුවීමට පියවර ගෙන ඇත. කටාර් රාජ්යයේ රාස් ලැෆාන් සහ මෙසායිඩ් යන කාර්මික නගරවල පිහිටි බලශක්ති මධ්යස්ථාන ඉලක්ක කර ගනිමින් මෙම ප්රහාර එල්ල වී තිබේ. ඉන් එක් ප්රහාරයක් මෙසායිඩ් හි විදුලි බලාගාරයක ජල ටැංකියකට ද, අනෙක් ප්රහාරය රාස් ලැෆාන් බලශක්ති මධ්යස්ථානයකට ද එල්ල වී ඇති අතර, ජීවිත හානි කිසිවක් වාර්තා වී නොමැති බව කටාර් ආරක්ෂක අමාත්යාංශය තහවුරු කරයි.
කටාර් නිෂ්පාදන අත්හිටුවීමේ නිවේදනයත් සමඟ යුරෝපයේ තොග ගෑස් මිල 50% කින් ද, ආසියානු වෙළෙඳපොළේ ගෑස් මිල 39% කින් ද වාර්තාගත ලෙස ඉහළ ගොස් ඇත. මීට අමතරව, ලෝක වෙළෙඳපොළේ බොරතෙල් මිල ද 13% කින් පමණ ඉහළ ගොස් ඇති අතර, එය බැරලයක මිල ඇමරිකානු ඩොලර් 82 සීමාව ඉක්මවා යාමට හේතු විය. මෙය 2025 ජනවාරි මාසයෙන් පසු වාර්තා වූ ඉහළම තෙල් මිල ලෙස සටහන් වේ.
කටාර් රාජ්යයට අමතරව සෞදි අරාබියේ පිහිටි ලොව විශාලතම තෙල් පිරිපහදුවක් වන ‘රාස් තනුරා’ මධ්යස්ථානයට ද ඉරානය ඩ්රෝන ප්රහාර එල්ල කර තිබේ. එම ප්රහාරයෙන් හටගත් සුළු ගින්නක් හේතුවෙන් පූර්වාරක්ෂක පියවරක් ලෙස එහි නිෂ්පාදන කටයුතු ද තාවකාලිකව සීමා කිරීමට සෞදි බලධාරීන් පියවර ගෙන ඇත. ඇමරිකාව සහ ඊශ්රායලය විසින් ඉරානයට එල්ල කරන ලද ගුවන් ප්රහාරවලට ප්රතිචාර වශයෙන් ඉරානය මෙම ප්රහාර මාලාව දියත් කර ඇති බව වාර්තා වේ.
හෝමුස් සමුද්ර සන්ධිය හරහා සිදුවන බලශක්ති සැපයුමට එල්ල වී ඇති මෙම බාධාව ගෝලීය ආර්ථිකයට දැඩි බලපෑමක් එල්ල කරනු ඇතැයි ආර්ථික විශේෂඥයෝ අනතුරු අඟවති. මේ අතර ඇමරිකාව, සෞදි අරාබිය සහ එක්සත් අරාබි එමීර් රාජ්යය ඇතුළු රටවල් කිහිපයක් ඒකාබද්ධ ප්රකාශයක් නිකුත් කරමින් ඉරානයේ මෙම ක්රියාව දැඩි ලෙස හෙළා දැක ඇති අතර තමන්ට ආත්මාරක්ෂාව සඳහා අයිතියක් ඇති බව ද අවධාරණය කර ඇත.
