ඉරානය සමඟ පවතින යුදමය තත්ත්වය තවත් මාසයක් වැනි කෙටි කාලයකින් අවසන් විය හැකි බව ඇමරිකානු ජනාධිපති ඩොනල්ඩ් ට්රම්ප් ප්රකාශ කර සිටියි. ඉරාන විප්ලවීය ආරක්ෂක බලකායේ මූලස්ථානය විනාශ කිරීමට ඇමරිකානු හමුදා සමත්වීමත් සමඟ ජනාධිපතිවරයා මෙම විශ්වාසය පළ කර ඇත. මේ දක්වා දියත් කළ ප්රහාරවලින් ඉරාන නායකයන් 48 දෙනෙකු මියගොස් ඇති බවත්, ඉරාන නාවික හමුදාවට අයත් යුද නැව් 9ක් විනාශ කර ඇති බවත් ඔහු වැඩිදුරටත් අනාවරණය කළේය.
මෙම මෙහෙයුම් සඳහා බී-2 ස්ටෙල්ත් (B-2 Stealth) බෝම්බ හෙළන යානා යොදාගනිමින් ඉරානයේ භූගත මිසයිල මධ්යස්ථාන වෙත රාත්තල් 2,000 බෝම්බ ප්රහාර එල්ල කර තිබේ. කෙසේ වෙතත්, මෙම ගැටුම් අතරතුර කුවේට්හි පිහිටි ඇමරිකානු කඳවුරකට එල්ල වූ ප්රහාරයකින් ඇමරිකානු සෙබළුන් තිදෙනෙකු මියගොස් තවත් පස් දෙනෙකු බරපතල තුවාල ලබා ඇත. මෙම ජීවිත හානි සම්බන්ධයෙන් ජාතිය ඇමතූ ජනාධිපතිවරයා, සිය සෙබළුන්ගේ මරණ වෙනුවෙන් දැඩි ලෙස පළිගන්නා බවට අවධාරණය කළේය.
ඉරාන උත්තරීතර නායක අලි කමේනිගේ අභාවයත් සමඟ මැද පෙරදිග කලාපය දැඩි අවිනිශ්චිතතාවයකට පත්ව ඇති අතර, හෝමුස් සමුද්ර සන්ධියේ පවතින බාධා හේතුවෙන් ලෝක වෙළඳපොළේ තෙල් මිල ඉහළ යාමේ අවදානමක් මතුව ඇත. ඊශ්රායල හමුදාව පවසන්නේ ටෙහෙරාන් අගනුවර ගුවන් බලය මේ වන විට තමන් සතු කරගෙන ඇති බවයි. ඉරානය ද සිය ප්රතිප්රහාර ලෙස කුවේට් සහ බහරේන්හි පිහිටි කඳවුරුවලට මෙන්ම ගල්ෆ් කලාපයේ තෙල් නැව්වලට ඩ්රෝන සහ මිසයිල ප්රහාර එල්ල කරමින් සිටින බව වාර්තා වේ.
